Aleanca Kosova e Re është e vendosur qe të mos e braktis koalicionin me LDK-në për t’iu bashkuar PAN-it.

Zëvendespresidenti i këtij subjekti, Vesel Makolli ka thënë se AKR i ka shqyrtuar të gjitha opsionet dhe ka marrë vendim përfundimtar qe t’i qëndroj besnik koalicioni ku janë aktualisht.

“Jo, nuk do t’i bashkohemi PAN-it. Ne po presim qe ata të dështojnë dhe presidenti më na dhënë mandatin neve. Të gjitha opsionet i kemi shqyrtuar dhe kemi marrë vendim qe me i qëndruar besnik koalicionit ku jemi”, ka thënë Makolli për ‘Indeksonline’.

Zyrtari i lartë i AKR-së, thotë se edhe nëse PAN i bën 61 vota dhe e formon qeverinë, atëherë do të ishte qeveri jostabile dhe e varur nga Lista Serbe, e cila nuk do të kishte zgjatur shumë.

Makolli ka thënë se zyrtarisht me sa është në dijeni nuk kanë marrë ofertë nga koalicioni fitues i zgjedhjeve.

Tutje, Makolli ka folur edhe për mundësinë qe deputeti i AKR-së, Labinot Tahiri të votojë për Haradinajn.

“Ndoshta ka pasur ndonjë luhatje të vogël, por në fund është marrë vendimi me respektuar qëndrimin e partisë dhe nuk besoj se do të ketë vota për PAN-in nga AKR. Labi është person humanitar dhe ai nuk e ka analizuar sa duhet. Atij ka mund t’i rrëshqasë ndonjë deklaratë. Edhe gazetarët kanë mund ta keqinterpretojnë ë. Unë e di qe ai i përkrah komplet vendimet e partisë”, ka shtuar Makolli.

Të enjten do të mbahet seanca konstituive ku pritet të zgjidhet Kryesia dhe Kryetari i Kuvendit.

Ndërsa, qeveria mund të dalë në votim një ditë pas konstituimit të Kuvendit.